احدثكم اليوم عن حالة الارتباك التي تصيب اي ادارة في مصر بمجرد اقتراب الخطر
بمعني ان الوزير يفضل طول السنة قاعد مأنتخ في التكيف و تتصل بيه جهات كتيير
حقوق انسان علي يونيسيف علي الصليب الاحمر علي منظمة الصحة العالمية و هو في الطراوة
هوبة توصل الكارثة ابواب مصر....
لكن للأسف مافيش قطز علشان يشيل المسؤلية وحده و يقول انا مسؤل عن حل المشكلة و بترها...؟؟؟
لا كل واحد يرمي الحمل علي غيره...علشان كدة لو تلاحظ في تخبطات كتيرة و قرارت في قمة الهمجية و لا تصدر من حكومة اطفال فما بالك بحكومة الكترونية ...
اعدام اكثر من ربع مليون خنزير لم يزنبوا بأنهم خلقوا خنازير و بهذه الهمجية و برغم تأكيد منظمة الصحة ان الخنازير ليست السبب في انتشار المرض و تغيير اسم الفيروس عالميا من swin flu الي H1N1 الا ان القرارات العنترية و الرغبة في الشو الاعلامي هي النزعة الاساسية للوزراء الفاشلون و بالمناسبة الانتشار الحالي للمرض بيكون من انسان لانسان...اتمني ما يطلعش قرار باعدام المصريين نفسهم او حرقهم بجاز في ميدان عام...
نأتي لنقطة اخري ربما غابت عن الجميع...
و هي موقفنا من التكنولجيا و الاتكالية الرهيبة علي الغرب
لم نشاهد اي جهة بحثية مصرية اعلنت مسؤليتها عن انتاج مصل او عقار او حتي تطوير طريقة علاج محترمة بالرغم ان مراكز الابحاث الدوائية عندنا علي قفا من يشيل...
و عندك مدينة بحثية اسمها مبارك في العامرية ....
عارف ليه ...؟؟؟
لو بحثت كدة و دورت في الاماكن دي مش هتلاقي كفاءات...و لا ناس مؤهلة للقيام بالوظيفة الاساسية لها و هي تطوير ادوية او لقاح...هتلاقي كوسة و عدس و بسلة و ناس بتخرط ملوخية...و بتحشي محشي
دا انا صعقت لما عرفت ان البرازيل بدأت في تحضير المصل مع الموجة الاولي للمرض و الرئيس البرازيلي وعد العالم بأنتاج المصل في ظرف ستة اشهر...
البرازيل دي اللي فيها قبائل سلط ملط ما يعرفوش الالف من كوز الذرة...
ده اسمه كبرياء علمي او تكنلوجي طبيعي ، للاسف احنا نفتقده تماما بمستوياتنا المتواضعة....
نقطة ثانية
التوعية الطبية نفسها ...
تلاقي اعلانات توعية غبية من عينة ملصقات المترو و القطارات...طبعا دي تحس انها موجهة لمتخلفين عقليا لأنها لا تحتوي علي اي معلومة مفيدة كلها كلام عام و ينطبق علي اي حالة اصابة بأنفلونزا...
لكن بص علي الغرب و الدول المحترمة تحس ان في توعية حقيقية باعراض المرض و الاعلام شغال لقاءات يومية مع اطباء و اكاديميين من جهات بحثية عليا و طبيعي انك تلاقي شغف المواطن الغربي نفسه بمعرفة كل شئ عن المرض لأن ده اصبح توجه عام في بلاده...
للاسف انا غير متفائل خصوصا مع اقتراب فصل الشتاء (البيئة الافضل للفيروس)
خالص تحياتي
